Talaga namang todo na ang excitement para sa nalalapit na “Mars Ravelo’s Darna” series ng ABS-CBN Entertainment dahil sa umani agad ng pinagsamang 4 million views sa social media at sunod-sunod na papuri mula sa netizens ang official trailer nito na inilabas noong Huwebes (July 7) ng gabi.
Tampok sa trailer ang pasilip sa buhay ni Jane De Leon bilang Narda, ang pag-eensayo niya kasama ang First Darna at ina na si Leonor na ginagampanan ni Iza Calzado, at ang karanasan ni Narda tungo sa pagiging makabagong Darna. Napanood ito pagkatapos ng TV Patrol at uploaded din sa social media accounts ng ABS-CBN Entertainment.
Nakatakda nang ipalabas ang serye sa Agosto. Pinangungunahan ito ni Master Director Chito S. Roño kasama ang iba pang director na sina Avel Sunpongco at Benedict Mique sa ilalim ng JRB Creative Production unit ng ABS-CBN.