Iba’t ibang balita tungkol as mga celebrities ang pinag-usapan nitong 2019. Karamihan dito, rated kontrobersyal at talagang madrama.
Pinagpiyestahan ang ‘di umano’y love triangle nina Bea Alonzo, Gerald Anderson, at Julia Barretto. Marami ang nagsabi na daig pa ng ingay nito ang national issues. Marami nga ang nag-abang sa sagutan ng tatlo, at nahati pa sa tatlong kampo ang mga netizens. May fans na Team Bea, Team Gerald at Team Julia. Kwento ni Bea, hindi niya alam na tapos na pala ang relasyon nila ni Gerald. Giniit naman ni Julia na hindi siya ang dahilan ng hiwalayan ng dalawa.
Nag-viral naman at mainit ding pinag-usapan ng netizens ang showbiz hiatus ni John Lloyd Cruz kasama ang karelasyong si Ellen Adarna. Sa gitna ng taon, lumutang pa ang balitang hiwalay na umano ang dalawa, pero hindi naman ito kinumpirma ng sinuman sa kanila.
Marami naman ang nagulat sa aktor na si Matteo Guidicelli sa kanyang pagpasok sa military. May 2019 nang inanunsyo ng aktor na sasabak siya sa Scout Ranger orientation course sa Camp Tecson sa Bulacan. Challenging man, nagtapos with flying colors si Matteo at nagawaran ng ranggong second lieutenant. Napasaludo din ang fans sa fiance ni Matteo na si Sarah Geronimo, sa ginawa niyang pag-rescue sa isang asong gala. Siyempre, sino ba naman ang makakalimot sa pag “yes” ni Sarah sa engagement proposal ni Matteo.
Bukod kina Sarah and Matteo, kilig overload din ang nadama ng netizens para sa bride-to-be na si Angel Locsin.
Biggest blessing naman para sa hugot queen singer na si Moira dela Torre ang kanyang asawa, na kinapitan niya sa oras ng mga hamon.
Instant idol ng ilang netizens si Dimples Romana, sa kanyang pagganap bilang si Daniel Mondragon sa teleseryeng Kadenang Ginto sa Kapamilya Gold.
Gumawa naman ng sariling pangalan bilang isang YouTube star si Alex Gonzaga.
Hindi naman matatawaran ang pagmamahal at pagpapatawad sa puso ng aktres na si Cherry Pie Picache, kung paano niya nahanap ang tapang para patawarin ang taong pumatay sa kanyang ina.
Marami ang nalungkot noong March 9 2019, sa pinaka huling performance ng komedyante si Chokoleit. Bukod kay Chokoleit, nagpaalam na rin ang buong Pilipinas sa batikang aktor at haligi ng Philippine Cinema na si Eddie Garcia.