Magtatambal sa unang pagkakataon sa “MMK” sina Joshua Garcia at Julia Barretto ngayong Sabado (Feb 18) para bigyang buhay ang kwento ng dalawang pusong maagang namulat sa kahulugan ng wagas na pagmamahalan.
Nakilala ni John (Joshua) si Aika (Julia) sa mga panahong naghihilom ang puso nito sa kanyang huling relasyon. Susuyuin ni John si Aika, ngunit may pag-aalangan ang dalaga dahil takot siyang masaktan muli.
Magpapatuloy sa panliligaw si John hanggang sa mahulog na rin sa kanya si Aika. Mapapawi ni John ang takot ni Aika na muling maiwan at bibigyan niya ng pagkakataon ang pag-iibigan nila.
Masaya sila sa piling ng isa’t isa hanggang sa ma-diagnose si Aika ng sakit na leukemia.
Paano nila haharapin ang hamong ito? Ano ang mangyayari sa kanilang pagmamahalan? Sino ang lalaban hanggang huli at sino ang bibitaw?
Makakasama din sa upcoming episode sina Allen Dizon, Nikki Gonzales, Devon Seron, Pamu Pamurada, Anjo Damiles, Kyra Custodia, Mikee Agustin, Lilet Esteban, at Raine Salamante. Ang episode ay sa ilalim ng direksyon ni Dado Lumibao at sa panulat ni Benson Logronio at Arah Jell Badayos. Ang “MMK” ay pinamumunuan ng Star Creatives COO na si Malou N. Santos.
Abangan ang longest-running drama anthology sa Asya, ang “MMK” tuwing Sabado ng gabi sa ABS-CBN o ABS-CBN HD (SkyCable ch 167). Panoorin nang libre ang latest episodes nito saiwantv.com.phoskyondemand.com.ph para sa Sky subscribers.