Makikilala na ang pinakabagong boy group na magpapakilig at maghahari sa inyong puso gabi gabi sa primetime sa pag-uumpisa ng Koreanovelang “Hwarang” ngayong Lunes (Oct 30) sa ABS-CBN.

Magsasama-sama sa “Hwarang” ang pinakatinitiliang Korean stars na sina Park Seo-Joon, Go Ara, Do Ji-Han, at Jo Yoon Woo, at K-pop idols na sina Choi Min Ho ng grupong Shinee, Kim Taehyung ng BTS, at Park Hyung-sik ng ZE:A.

Bubuuin nila ang Hwarang o grupo ng pinakamahuhusay at pinakamakikisig na mandirigma na handang ipagtanggol ang kaharian sa ano mang nakaambang panganib. Ngunit lingid sa kaalaman nilang lahat na ang kanilang pinakamalaking laban ay mag-uugat mismo sa kanilang kasamahan— sina DogBird (Seo-Joon) at Ji Dwi (Hyung Sik).

Mula ng patayin ang best friend ni DogBird na si Sun Woo dahil nakita nito ang mukha ng hari na itinatago ang mukha sa buong kaharian para mapangalagaan ang kanyang kaligtasan, ay sinumpa niya na ipaghihiganti niya ito sa abot ng kanyang makakaya. Kaya naman sumapi siya sa Hwarang at nagpanggap bilang si Sun Woo.

Doon, magkukrus ang landas nila ni Ji Dwi, ang hari na naging dahilan ng pagpaslang sa matalik niyang kaibigan. Walang kamalay malay ang dalawa na sila pala ay may sisidhing hidwaan hindi lang sa ngalan ng paghihiganti, kung hindi sa ngalan din ng pag-ibig dahil iibig sila sa iisang dalaga, si Ah Ro.

Paano nila haharapin ang katotohanan gayong magiging mabuti silang magkaibigan bilang miyembro ng Hwarang? Ang magkakampi ba ay magiging mortal na magkaaway? Sa laban ng pag-ibig, sino ang magwawagi? Sa pagkabunyag ng lihim ng nawawalang hari, anong panganib ang idudulot ng mga taong naghahangad sa trono?

Huwag palalampasin ang pagsisimula ng “Hwarang” ngayong Lunes (Oct 30) pagkatapos ng “The Good Son” sa first and true home of Asianovelas, ABS-CBN. Para sa updates, i-like ang https://www.facebook.com/abscbnkapamilyanovelas/ sa Facebook o i-follow ang @KapamilyaNovela sa Twitter. Maari ring panoorin ang past episodes ng programa via www.iWanTV.com.ph.