Makikipagsabayan sa matinding drama ang TV host-actress na si Isabelle Daza na bibida kasama ni Miles Ocampo sa upcoming family drama episode ng "Maalaala Mo Kaya" (MMK) ngayong Sabado (Marso 7).
Ang kauna-unahang "MMK" ni Isabelle ay tungkol sa magkapatid na Myra (Isabelle) at Thelma (Miles) na ang samahan ay magkakalamat habang lumalaki dahil sa mga kinimkim na galit at selosan sa atensyong ibinibigay ng kanilang mga magulang. Ngunit magbabago ang lahat nang ma-diagnose si Myra na may malubhang sakit sa bato.

Paano mapagtatanto ng magkapatid na sa kabila ng lahat ay mahal nila ang isa't isa? Hanggang saan ang kayang isakripisyo ni Thelma para pahabain ang buhay ng pinakamamahal niyang kapatid?

Tampok rin sa "MMK" episode sina Belle Mariano, Althea Guanzon, Snooky Serna, Allan Paule, Ryan Ramos, John Servilla, Raquel Montesa, Nathan Lopez at Bea Basa. Ito ay sa ilalim ng direksyon ni Jerry Lopez-Sineneng at panulat ni Ruel Montañez. Ang “MMK” ay pinamumunuan ng business unit head nito na si Malou Santos at creative manager na si Mel Mendoza-Del Rosario. 

Sa loob ng 23 taon, bahagi na ng bawat pamilyang Pilipino saan man sa mundo ang “Maalaala Mo Kaya” na bawat Sabado ay nagpapaluha, nagpapangiti, at nagbibigay-inspirasyon sa TV viewers sa pamamagitan ng mga totoong kwentong buhay na ibinabahagi ng letter-senders ng programa.

Huwag palampasin ang longest-running drama anthology sa Asya, “MMK,” tuwing Sabado, 7:15PM, pagkatapos ng “Home Sweetie Home” sa ABS-CBN. Para sa iba pang updates, mag log on sa MMK.abs-cbn.com, sundan ang @MMKOfficial sa Twitter, at i-like ang Facebook.com/MMKOfficial. Samantala, maaari na ring panoorin ang full episodes o past episodes ng “MMK” gamit ang ABS-CBNmobile. Pumunta lamang sa www.abscbnmobile.com para sa karagdagang impormasyon.