Maymay, kakalimutan ang hinanakit para sa kabutihan sa “Wansapanataym”




Magbabago na ang takbo ng buhay ni Espie (Maymay Entrata) sa pagbukas ng kanyang third eye dahil ito ang kanyang gagamitin upang tulungang mabigyang hustisya ang pagkamatay ng multong si Vincent (Edward Barber) sa “Wansapanataym Presents: Ikaw ang GHOSTo Ko” ngayong Linggo (Hulyo 29).

Madadagdagan pa nga ang pagsubok ni Espie, dahil bukod sa pagtatago niya sa sindikato, magkikita na silang muli ni Vincent, ang lalaking nanakit sa kanya nang lubos. Ngunit hindi ito ang pagkikitang inaasahan niya dahil isa nang multo si Vincent, at hihingi ito ng tulong upang makausap ang kanyang ina gamit ang kapangyarihan ng dalaga.

Dahil sa galit at takot, pilit na lalayo at tatanggihan ni Espie ang pakiusap ng multong binata. Pero kalaunan lalambot din ang puso nito, at pipiliin nang gamitin ang kapangyarihan sa kabutihan imbis na manloko bilang isang pekeng manghuhula.

Maging madali nga kaya para kay Espie ang kanyang misyon?

Samantala, agad na tinutukan ang unang episode ng serye matapos nitong magkamit ng national TV rating na 26%, kumpara sa “Daig Kayo ng Lola Ko” (17.4%), ayon sa datos ng Kantar Media.

Umeere na sa loob ng halos dalawang dekada, ang “Wansapanataym” ang kauna-unahang Filipino program na nakatanggap ng nominasyon sa prestihiyosong International Emmy Kids Awards para sa best TV movie/mini-series category. Katapat nito ang mga programa mula Netherlands, United Kingdom, at Australia.

Panoorin ang mga eksenang kapupulutan ng aral sa “Wansapanataym Presents: Ikaw ang GHOSTo ko” sa ABS-CBN at sa ABS-CBN HD (SkyCable ch 167). Para sa updates, i-follow ang @abscbnpr sa Facebook, Twitter, at Instagram o kaya’y bisitahin ang www.abscbnpr.com.

 

WE RECOMMEND