Top 48 aspirants ng MNL48, lumalagablab ang pasiklaban sa “It’s Showtime”

 

Matapos ang matinding trainings at lingguhang pasiklaban sa “It’s Showtime” stage, napili na ang top 48 aspirants na patuloy na maglalaban-laban upang mapabilang sa pinakaunang all-girl idol group ng bansa na MNL48, ang Pinoy version ng popular na grupong AKB48 ng Japan.

 

Matapos ang isa na namang live elimination noong Sabado (Marso 24) kung saan pitong aspirants ang nagpaalam sa kumpetisyon, sasabak ang natitirang 48 aspirants sa panibagong challenges para mas mapalapit sa kanilang pangarap na maging isang ganap na idol.

 

Ngayong linggo, hinati sa iba’t ibang grupo ang top 48 girls upang mag-perform araw-araw sa entablado ng “It’s Showtime” upang maipakita pa sa madlang people ang kanilang ibubuga at mangampanyang para sa mga boto na makapagpapataas sa kanilang individual standing.

 

Base sa huling official ranking na ipinalabas ng programa, nanguna pa rin si Eunice mula Cabanatuan sa ikalimang magkasunod na linggo. Sinundan siya nina Sheki ng Quezon City, Sayaka ng Legazpi City, Abby ng Bacoor, Gabb ng Pasig City, Tin ng Iloilo, Alice ng Quezon City, Trixie ng Marikina. at ang kambal na sina Shaina at Shaira ng Cainta.

 

Sa puntong ito ng kumpetisyon, mahalaga sa bawat aspirant ang mapabilang sa weekly top 10 dahil mapapataas nito ang tsansang mapasama sila sa first generation ng MNL48.

 

Malalaking premyo naman ang nag-aabang sa top seven girls na mapipili sa pagtatapos ng laban, dahil lilipad sila sa Japan para sumailalim sa training sa AKS, ang prestihiyosong talent agency na siyang humahawak sa AKB48. Magkakaroon din sila ng endorsement at recording contracts, pagkakataon na mag-perform kasama ang AKB48 at iba pang sister groups mula sa Thailand, Taiwan, India, and Indonesia, at maging headliners sa daily performances ng grupo sa itatayong MNL48 theater.

 

Maaari namang suportahan ng mga tagahanga ang kanilang “oshi” o paboritong aspirant sa pamamagitan ng pagboto sa MNL48 website (MNL48.ph) at mobile app, kung saan makikita ang ranking ng mga aspirant at video updates tungkol sa kanila.

 

Sino-sino kaya sa top 48 girls ang mamamayagpag sa mga susunod na linggo at makakarating sa dulo para bumuo sa ultimate Pinay idol grop?

 

Para sa updates sa MNL48 at para makilala pa ang top 48 girls, manood lamang ng “It’s Showtime” at ang online show nito sa YouTube araw-araw, at sundan ang @mnl48official sa Twitter, Instagram, at Facebook.

WE RECOMMEND